Gliu ré stéje facènne gliù gire de tutte glie paise de gliù règne pe veré comme jévene le cose e pe fa capì a tutta la génte ca isse, da buonu pate de famiglie, a gliù pòpeglie glie vuléje béne e ci tenéje ca tutte quante stévene feglice e cuntiénte.
Chélla vote avéje menute cu la nave, e avéje scése a Montesicche.
Tutte gli piézze gruosse, ceviglie e meglietare, e nainte’ata gènte, gli’avévene aspettate agliù sbarche e dòppe glie salute e tutte l’ate ciance e ammuine, na bèlle pruggiussione se stéje muvènne pe gli’accumpagnà a gliù palazze sije, de fronte a la pòrte de mare, chélle vicine a la ‘Unziate.
S’avévene juste ncamminate quanne, de bòtte, gliù ré, ha fatte la faccia brutte, s’é fermate, ha pigliate de pètte gliù prime che gli’é capetate sotte mane, e gli’ha ditte:
"Vòglie sapé pecché n’avite sparate gliù cannone!". Chigliù pòveriéglie n’nzapéje che dice; dòppe, però, s’ha fatte curagge e ha rispuoste:
"Maistà, nuje gliù cannone n’n gli’amme sparate pe ciénte e une mutive".
De fronte a chélla risposte gliù ré n’n ce ha viste chiù. Isse già stéje ne pò seccate pe chélle ch’aveje succiésse la settemana prime a Casamiccele addo’, dòppe ch’ha dumannate chélle che putéje fà pe gliù paése, cu n’arbacìe comme n’nzavéje maie viste, gli’avévene rispuoste: "Maistà, nuje n’avimme besuogne de niénte!"
Là pe’llà gliù ré avéje penzate: "Casamicciulése, fanatece e fésse!", e n’n se l’ha pigliate chiù de tante. Ma mò, a Gaéta, ècche nata rispòste a spaccàstrommele.
"Niénte niénte," ha ditte tra sé, "n’n ci’avésse èsse chiù respiétte? Mò me sèntene, àte che pate de famiglie!"
Allore ha’izate la voce per se fa sentì da tutte quante e ha ditte:
"Fermìteve! Accà n’nze va da nisciuna parte. Anze, saje che vulimm fà ?, purtìteme subbete na sègge!".
"Na sègge? Che ci’hadda fà cu na sègge?" ha penzate la gènte attuorne. Ma chélle che dice gliù ré n’n se descute.
Perciò: "Muìteve!, na sègge pe gliù ré; subbete!"
Ma ate che sègge, pe gliù ré ce vuléje na pultrone e accussì: "priéste, fuìte na pultrone pe sua maèstà!" E accussì, p’accuntentà gliù ré, chi d’accà e chi d’allà, s’é fatte nu fuia fuie generale.
A buon cunte, dòppe nu bèglie pò, ècche arrevà na pultrone. Allore, gliù ré s’é azzise, e ha ditte:
"Mò, cu còmede, chiglie mutive, me gli’avita dice tutt’e ciénte e une!"
Tutte zitte! Nisciune che tenéje gliù curagge de parlà; ma dòppe ne pò, s’é fatte annannze une, e ha cumenzate:
"Maéstà, prime,.... n’n tenimme gliù cannone..."
"Baste," ha fatte gliù ré, "gli’ate e ciénte n’n glie vòglie sentì."